عودة إلى "تازوفريت" في أزيلال

في قاعة العمليات -مراكش-

عاوتاني غادي نرجع نولي زوفري...

عاوتاني غادي نبدا نشطب ونجفف ونصبن ونطيب ونشري الخضرة و5دراهم ديال اللحم باش نصيب الطاجين، وفطور أكسبريس مقيوم ب4دراهم: درهم أتاي ودرهم سكر وخبزة وفرماجة ديال البقرة الضاحكة. ضاهر ليا غير نشد الرابيل في شهر 11 ونقول الواليدة باغي نكمل ديني، وديك الساع أراه برع... الله يجيبنا في الصواب وصافي.

لكن هذه المرة كاين شوية ديال الاختلاف، ياسمينة بادو شيرات بيا لقاع الجبل، للأطلس (ماعرفت إينا واحد فيهوم) لأزيلال باش نمشي نبنج عباد الله، أمنا بالله ورضينا بالمكتوب ومشينا على وعدنا وسعدنا وخا ديك خايتي ديال ياسمينة مافيها خير ودارت لينا الراو الداو rawdaw في العام والنقط ديالو على قبل مقررات التوظيف اللي تعطلو، وداك المندوب ديال الصحة اللي فيه بوتفتاف حقاش باقي جديد وممحكوكش مزيان .. في الحقيقة تكرفست مع الأوراق والادارة دين مها الكلب اللي جلست عندو تيخليك تتسنى ساعات حتى تطيب ليك القاعدة على قبل توقيع. هادشي كيزيد يأكد ليا ان الادارة في المغرب تعتبر من عوائق التنمية في البلاد ديال محمد رقم 6، داكشي علاش المعارف مهمين، المحسوبية والزبونية ضرورة حتمية في هاد البلاد التعيسة، ويسمحوا لينا دوك الناس اللي قراونا العكس راكوم غير تاتعاودو حلمة على حمار، وداكشي ديالكوم مع الدورة تايبان لينا ما حمانشن وتنجرب غير معا راسي، مللي تاندير الصف مع الناس تايحكروك وتايسبقو الناس عليك وتاتبقى نتا تاتشوف تيتي نيني عرص كاع ماكاين اللي يديها فيك، شحال من مرة طرات ليا حتى في السبيطار الذي أعتبر من موظفيه. ولكن مللي تانخدمو التيليفونات والناس اللي تانعرفو تايقضو ليك الغرض بالسرعة الفائقة.. ولكن في الحقيقة راه واخا بحال هاكاك راه خاص الواحد فينا مرة مرة يدير الخدمة ديالو بلا فرزيات ويدير الخير وينساه كيف ما تايقولو لوالا..

شينا لأزيلال، نعاما أسيدي، ماضبرت على الكرى حتى خريت خصوصا مع الصهودات.. نفعاتني غير واحد الاخت ممرضة الله يجازيها بيخير، لقينا دار، ب14 ألف ريال، قلت لمولاها بشحال كونتي كاريها قالي 14 نيت. ناري على كذاب، تصابت السيدية اللي كانت كارية عندو معرفة والثمن هو 9. وزاد فيه نيت. ماعليش،أصلا الكراء في أزيلال طلع لسما مع الموظفين اللي بداو تيجيو يخدمو هنا، البوليس والمحكمة وصحاب التجهيز كاع هادو تزادو في دقة واحدة. وقعات الّأزمة وحمدنا الله وشكرناه، كمدناها وسكتنا.

بينما لقيت الكرا وحتى مللي كونت كاري كاع، كونت جالس عاند واحد الصديق الرفيق من خوتنا في الله دياول الطليعة، الله يعمرها دار. والواليدة ديالو والواليد والاخوة ماقصروش، نردوها ليهوم في ساعة الخير ان شاء الله.

أما المدينة د ازيلال، جات في الجبال، ولكن أ خويا راها أحسن من الرباط، نقية وناسها ظريفين وكالم calme. والمعيشة مزيانة ماغالياش. شلالات أوزود حدانا وحتى بين الويدان ومدينة بني ملال وعين أسردون. هاد المناطق كولها ديال السياحة الجبلية، سبحان الخالق.

الناس هنا راضين على المجلس البلدي الحالي، خدامين تايقولو الناس، شادو الاتحاد الاشتراكي والرئيس اسميتو وغاض، تاقولو عليه مزيان. وفي المجلس كاينين غير الاشتراكيين، حتى الطليعة.  وفي الجمعيات كاينة المواهب وشي جمعيات اخرين محلي داكشي، وحتى النقابة كاينين أصحاب بوسبرديلة (الأموي). 

خاصنا تاحنا نديرو شي حاجة... 

ودابا نوضو نقابلو المعلمين راه ماعرفتش أش تيرونو تماك، ونمشي نصيب الفطور ديالي

زهير ماعزي 

ثالث أيام رمضان