الخميس، 19 أغسطس 2010

وا شبيبتاه! حوار افتراضي حول الاوضاع الحالية للشبيبة الاتحادية

- اش واقع في البلاد على المستوى السياسي؟
- الاتحاد الاشتراكي عاوتاني....
- مالو أش دار؟ خرج من الحكومة؟
- لا.
- تحالف مع اليسار؟
- لا
- خرج لينا هاديك مذكرة الاصلاحات الدستورية اللي قالك با عبد الواحد عطاها للمعلم؟
- لا
- دار اضراب، شي بيان مقود، انتقد المخزن، رجع اللي خرجو، شي نقذ ذاتي واعر، التزم بقرارات المؤتمر، غير  الخط السياسي، رجع تاني كيأطر في المواطنين، تار شي بيلانتي في التسعين للخوانجية، ... قولي قولي اش دار... راه بغيناه يرجع لينا، توحشنا الاتحاد الاشتراكي ديال زمان ديال بالصح، راه واخا كانو لحباسات واللي دوا يرعف، ولكن كان عزيز على الشعب... إيوا، قوللي بالزربة أش دار الله يرحم ليك الواليدين والله يسمعنا اخبار الخير...
- لا أصاحبي، هادشي اللي تاتقول فيه مزيان وكاملنا بغيناه ولكن ماداروش ا صاحبي، المكتب السياسي عطا الورقة الحمرا للمكتب الوطني ديال الشبيبة...
- الله ينعل ليك الواليدين، واش هادي اخبار اللي جايب ليا، سير الله يعطيك ما تاكل.
- اه! زعما بقا فيك الحال؟
- في الصراحة، ماشي بالزاف، كونت عارف باللي الثقافة السلوكية اللي ولات في الحزب هادي 10 سنوات مايمكنش تعطي إلا بحال هاد الكعيات.
- هادشي اللي كاين في السوق أ الرفيق، هاك قرا البلاغ ديال المكتب السياسي. راهوم اجتامعو مع المكتب الوطني للشبيبة ومن بعد داروا اللي عجبهوم في اجتماع المكتب الحزبي، هادشي كاملو نوضاتو واحد النشرة داروها أعضاء في الشبيبة ودارو فيها شي روينة، دابا نسيفطها ليك في الايميل اذا بغيتيها (1).
- عرفتي، هادشي غير تحصيل حاصل لمجموعة من الاخطاء التي استمرت منذ المؤتمر الاخير الذي ضرب فيه اصحاب الكحص، واغتيلت فيه الديمقراطية. وانا اعتقد ان اعضاء من المكتب السياسي الحالي والسابق يتحملون جزءا من الوضع الحالي للشبيبة الاتحادية.
- عندك الحق أ الرفيق، واش أ صاحبي ولاو تايتعاملو معانا بحال شي أرقام تتستعمل لحسم الانتخابات الداخلية في المؤتمرات المحلية والاقليمية والوطنية، ولينا بحال بطاقة التعبئة لشي بعضين.
- ويييييه! شي عوينة ديال المخزن ضرباتنا، وولينا بحال لحمير ديال الحملة الانتخابية، الحزبيين تايتعاملو مع الشباب من الانتخابات للانتخابات غير باش يفرقو لوراق ويضربو الرش بحال الشيخات. وا أسفاه! الشبيبة الاتحادية التي كانت قادة توقف المغرب ووقفاتو في 96 أيامات البصري والحسن الثاني  من أجل الاصلاحات الدستورية دابا موحال تقدر توقف حتا طوبيس! 
- نتا لموك تاتقلب على شي ورقة حمرا، رد بالك راه الحزب داير قرون هاد ليامات ومنكري وخاصو شي دجاجة يذبحها نهار العيد
- ومال مها، اللهم الورقة الحمرا في الجيب ولا القويلب في ال(...) علاه نسيتي اعمال المخابرات القذرة ديال التليفون اللي دارو ليا وانتحال صفة صحفي باش يجبدو ليا لساني قبل أن ينقلب السحر على الساحر ..
- وييه غير خللي داك الحمار ناعس، ماشي وقتها دابا.
- راه قالك هادشي كامل اسبابو المدابزة ما بين اصحاب لشكر واصحاب اليازغي...
- ماشي بهاد البساطة. اودي، راه قولتها ونعيدوها ليك، انا عارفك حمار ما بنفع معاك غير التكرار... كون بعقلك وكون حر ومستقل, راك في حزب حداثي زعما ماشي في قبيلة ولا زاوية تابع وديار كي الكورال غي تاتعاود. وغير قولينا انت دابا فاش تايختالف اليازغي مع لشكر دابا, راهوم بزوج مقصرين في الحكومة وبزوج عندهم تصور واحد للشبيبة. بغاونا نديرو المخيمات والمسرح ودروس الدعم والتقوية نفرقو les préservatifs dans les Douars pour qu'on soit moderniste.  وبغاونا ما نديروش السياسة علاه نسيتي مللي جابو لينا البيغ، الساعة مع الدورة دار في اليازغي. فين كاين الفرق بيناتهوم دابا اللهم شي حزازات وعقد نفسية كبرات بيناتهوم وحنا تاندفعو الثمن.
- وييييه! عرفتي مع هاد الروينة الواحد يمشي يدير شي جمعية في دار الشباب ويستاراح مع راسو.
- وعلاش اللي ما نديروش الشبيبة الاتحادية في دار الشباب ونستاراحو مع راسنا، وتولي جمعية وطنية شبابية تساند المشروع الفكري والسياسي للاتحاد الاشتراكي وتكون العضوية فيها لا تستلزم العضوية في الحزب بالضرورة، أنا في الحقيقة وليت تانحس بالحزب تايشكل ليا عائق في الاشتغال ديالي مع الشباب باش نكونو واضحين، داكشي علاش بغيت نجربو صيغة جديدة، راه الشباب المغربي يساند فكر الاتحاد لكن خطه السياسي الحالي بالنسبة للمغاربة ككل غير مفهوم والدفاع عنه جد مكلف.
- وكيف بغيتي تدير مع الحزب أ مسخوط. راك غادي تخلعهم.
- الحزب على راسي وعينيا، وهادشي لمصحتهوم. وماخاصناش نوقفوا أمام عجلة التاريخ والخوض في الشأن الشبابي المغربي بأليات ووسائل الامس وتاحراميات ديال الاحزاب الشيوعية، راه دزنا من القطاع الحزبي إلى المنظمة نصف الجماهيرية ودابا جا وقت المنظمة الجماهيرية. والعلاقة بينا وبين الحزب تراوحت بين الوصاية والمصاحبة ودابا جا وقت الاستقلالية والشراكية والتعاقد المكتوب. وسموحو ليا، راه هادي هي الحداثة والديمقراطية.
- وفكرة هادي، تقدر تكون مزيانة لكن الصراعات الشخصية غادي...
- اودي! راه الصراع ماشي غي شخصي فقط، راه صراع سياسي ومخاض فكري، ولكن اش غادي تدير مع الصحافة الصفراء وقليلي الفهم. راه نحمد الله ونشكره على ان الاتحاد فيه هاذ الحركية وهاد النقاش بهاد الحدة، شي احزاب راه فيها غير "سمعنا واطعنا وإليك المصير"، وماكاين غير "الاجماع الاجماع الاجماع"... 
- حتى انا تانقولها، وعاش الاتحاد الاشتراكي وعاشت الشبيبة الاتحادية. وخاصنا نوضو جميع باش نرجو التران للسكة الحقيقة ديالو
- هادا هو الكلام. تبارك الله عليك.

(1) من يريد الحصول على النشرة ليكتب ايميله في التعليق.


هناك تعليقان (2):

  1. tres bien camarade wakha makanch 3lik tgol 9adiyat l a3mal l9adira 7it machi ay wa7d ghadi y9ra hadchi rah iti7adi o ghadi ytss7abou l 7izb fih hi l a3mal l9adira mé en general lma9l fih ibda3 o f lmosstawa o ta7lil wa9i3i tres bien mara okhra

    ردحذف
  2. شكرا محمد السابي على المرور البهي
    لكن يجب أن نعترف ان هناك ازمة ممارسة أخلاقية داخل العمل الساياسي والحزبي ككل، وهو جزء من أزمة الاخلاق داخل المجتمع أيضا... ومواجهتها لن تكون بالتعتيم لكن بالفضح

    ردحذف